Մտածում էինք, որ Թի Էֆ Սի (Թրեյլզ Ֆոր Չեյնջ ՀԿ)-ի՝ արահետ կառուցողի ծանր աշխատանքով կհետաքրքրվեն միայն տղաները: Բայց արի ու տես, որ մեր թափուր հաստիքներին առավել հաճախ դիմում են աղջիկներ։ Զարմացա՞ծ եք, մենք էլ։
Թի Էֆ Սի-ում ծանր գործիքներով արահետ կառուցողի աշխատանքի համար դիմողների 53% իգական սեռի է։ Արահետաշինությանը ամենամոտը կանգնած ոլորտներում և՛ս աղջիկների ներգրավվածությունն աճել է, իսկ որոշ դեպքերում նաև գերազանցում է տղաներին։
Եկեք Խոսենք թվերով՝
Տրանսկովկասյան Արահետը մեր տարածաշրջանի ամենաերկար քայլարշավային արահետն է, մոտ 3000 կմ, որի կառուցումը սկսվել է 2016թ-ից և մի քանի տարի անց ամբողջությամբ պատրաստ կլինի: Կազմակերպությունից տեղեկացանք, որ մինչ այս իրենց դիմած 200 կամավորներից 120-ն իգական սեռի է եղել։
Արմլենդ արշավային ակումբի արշավներին վերջին երեք տարիների ընթացքում մասնակեցել է 1201 աղջիկ և 623 տղա։ Ըստ հիմնադիր Արտյոմ Մարտիրոսյանի՝ եթե մի քանի տարի առաջ կանանց ներգրավվածության խնդիր կար, հիմա հակառակ երևույթն ենք տեսնում։
Շուտով նույնը կտեսնենք նաև լեռնային ուղեկցորդների շրջանում՝։ Այս մտքին հանգեցինք Ալպինիզմի Հայկական Ֆեդերացիայի փոխնախագահ Սուրեն Դանիելյանի հետ զրույցից հետո։ Ֆեդերացիայի իրականացրած լեռնային ուղեկցորդի պատրաստման դպրոցի ուսանողների 65%-ն իգական սեռի է։
Իսկ զբոսավարների շրջանում աղջիկները մի քանի անգամով են գերազանցում տղաներին։ Ոլորտի գիտակ Դավիթ Դավթյանի վարած զբոսավարի պատրասման դասընթացների մասնակիցների 80% իգական սեռի է եղել մինչ այս։ «Ներկայիս խմբում էլ՝ 26 մասնակցից տղաների թիվն ընդամենը 7-ն է»,- հավելում է Դավիթը։
Ավելացել է նաև աղջիկ հեծանվորդների թիվը։ Հայաստանում հեծանվային կյանքի զարգացմամբ զբաղվող Վելո Քլաբ-ի հիմնադիր Էմիլ Ասատրյանն ուրախ նոտայով նշում է․ «Երբեմն մեկ արշավի ժամանակ միաժամանակ 10 աղջիկ մասնակից ենք ունենում։ Առաջ մենք տղաներով էինք գնում հեծանվարշավի» (ժպտում է)։
Ըստ Հեծանվորդների Ֆեդերացիայի նախագահ Արման Անտոնյանի՝ վերջին տարիներին աղջիկների թիվը հեծանվային մշակույթում զգալի մեծ է։ Այս պահին այն կազմում է ամբողջ թվի շուրջ 25-30%։
Իսկ ըստ Հայկական Լեռնային Ակումբի համահիմնադիր Մխիթար Մխիթարյանի՝ Աղջիկների ներգրավվածությունը լեռնամագլցման մեջ նույնն է մնացել և զիջում է տղաներին 10%-ով։
Կհանդիպենք սարերու՜մ։